Еврокомиссия Тожикистоннинг учта банки — «Спитамен Банк», «Душанбе Сити Банк» ва «Коммерсбанк Таджикистана»ни санкциялар рўйхатидан чиқарди.

Тожикистон Миллий банки маълум қилишича, бу қарор Европа ҳамкорлари билан олиб борилган музокаралар натижасида қабул қилинган. Регулятор бу қадам мамлакат банк тизими ривожига ижобий таъсир кўрсатишини таъкидлаган.

Аввалроқ ушбу банклар Европа Иттифоқининг Россияга қарши 19-санкциялар пакети доирасида “қора рўйхат”га киритилган эди. Улар Россия билан молиявий операциялар орқали санкцияларни четлаб ўтишга кўмаклашганликда гумон қилинган.

Шу билан бирга, 23 апрель куни Евроиттифоқ Россияга қарши 20-санкциялар пакетини ҳам тасдиқлади. Унда портлар, танкерлар, криптовалюта платформалари ҳамда Россия ҳарбий-саноат комплекси билан боғлиқ компания ва шахсларга нисбатан чекловлар киритилган.

Эътиборлиси, янги санкциялар доирасида Ўзбекистонда фаолият юритувчи «Раw Materials Cellulose» ва «Фарғона кимё заводи» корхоналарига нисбатан ҳам чекловлар жорий этилган. Қарорда уларнинг Россия ҳарбий-саноат комплекси билан эҳтимолий алоқалари қайд этилган.