Davlat xavfsizlik xizmati matbuot xizmatining ma’lum qilishicha, hududlarda mansab mavqeidan g‘arazli maqsadlarda foydalangan huquq-tartibot idoralari xodimlari qo‘lga olingan.

Xabarga ko‘ra, Buxoro viloyati IIB xodimi jinoyat ishini tugatishda mansabdor shaxslar orasidagi tanishlari orqali gumonlanuvchidan yordam berish uchun 13 ming dollar talab qilgan. U so‘ralgan pulni olayotgan vaqtida qo‘lga olingan.

Yana bir holatda, Toshkent viloyati IIB qo‘riqlash boshqarmasi Angren shahar bo‘limi oddiy xodimi boshqarma komandiri o‘rinbosari bilan til biriktirib, Oqqo‘rg‘on tumanida yashovchi fuqarodan qo‘riqlash bo‘limiga ishga joylashishda yordam berish uchun 1,5 ming AQSh dollari talab qilgan.

“Mazkur shaxs avans sifatida 1000 AQSh dollarini olayotgan vaqtda jinoyat ustida ushlangan”, – deyiladi xabarda.

IIV Migratsiya va personallashtirish boshqarmasi “Toshkent” xalqaro aeroporti pasport-viza bo‘limi katta inspektori 400 AQSh dollari miqdorida pora olayotgan vaqtida jinoyat ustida ushlangan.

Dastlabki tergov davomida ma’lum bo‘lishicha, joriy yil boshidan buyon katta inspektor O‘zbekistonda bo‘lgan 42 nafar chet el fuqarosidan chiqish vizasi rasmiylashtirgani uchun 300-700 AQSh dollari, shuningdek, hamroh bo‘lgan shaxsga tezkor muhr bosilishi uchun sakkiz nafar O‘zbekiston fuqarosidan 200-400 AQSh dollari olgan.

Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, barcha gumonlanuvchilar qamoqqa olingan.

Hozirda yuqoridagi holatlar yuzasidan tergov harakatlari olib borilayotgani bildirilgan.

• DXX
• Jinoyat
• Korrupsiya
• Pora