“Qozog‘iston Sog‘liqni saqlash vaziri 2025-yil 1-oktyabrdagi buyrug‘i bilan majburiy tibbiy chora sifatida kimyoviy kastratsiyani qo‘llash tartibiga o‘zgartishlar kiritdi”, – deb xabar bermoqda Zakon.kz.

O‘zgarishlarga ko‘ra, 18 yoshdan katta bo‘lgan va bolalarning jinsiy daxlsizligiga qarshi jinoyat sodir etgan shaxslarga nisbatan kimyoviy kastratsiya faqat sud qarori bilan amalga oshiriladi. Bu chora jinoyatni sodir etgan shaxs ozodlikdan mahrum etish muassasasida jazo o‘tayotgan davrda, ya’ni ozodlikka chiqishdan olti oy oldin bajariladi.

Shuningdek, jazo muddati tugashidan 12 oy oldin, muassasa ma’muriyati sudga hujjatlar yuborib, sud-psixiatriya ekspertizasi tayinlanishi uchun iltimosnoma kiritadi. Ekspertiza natijasida mahkumda psixik og‘ishlar yoki jinsiy zo‘ravonlikka moyillik mavjud yoki yo‘qligi aniqlanadi.

Vazirlik ta’kidlashicha, mazkur tartib ruhiy kasallikka chalingan, ammo xulqini nazorat qilish qobiliyati saqlangan shaxslarga nisbatan qo‘llanilmaydi.

Buyruq 2025-yil 17-oktyabrdan kuchga kiradi.

• Jazo
• Qozog‘iston
• zo‘ravonlik