Kecha, 2025-yil 8-oktyabr kuni soat 20:35 da Farg‘ona xalqaro aeroportiga Turkiya Respublikasining Istanbul shahridan uchib kelgan samolyotda 13 yoshli O‘zbekiston fuqarosi vatanga qaytdi.

U chet elda og‘ir hayotiy vaziyatda qolib, O‘zbekiston Respublikasining Istanbuldagi Bosh konsulxonasi xodimlariga yordam so‘rab murojaat qilgan.

Ushbu holat yuzasidan Tashqi ishlar vazirligi hamda O‘zbekiston Respublikasi Prezidenti huzuridagi Ijtimoiy himoya milliy agentligining tezkor hamkorlikdagi harakatlari natijasida voyaga yetmagan fuqaro xavfsiz ravishda vatanga qaytarilgan.

Farg‘ona xalqaro aeroportida uni Qo‘qon shahar “Inson” ijtimoiy xizmatlar markazi xodimlari kutib olib, bolaning keyingi taqdiri — ya’ni uni buvisi qaramog‘iga topshirish masalalari bo‘yicha zarur choralarni ko‘rmoqda.

Voyaga yetmagan fuqaroning ijtimoiy himoyasi va psixologik qo‘llab-quvvatlanishi uning doimiy yashash manzilida davom ettiriladi.

Shuningdek, hozirda O‘zbekiston Respublikasi Ichki ishlar vazirligi, Ijtimoiy himoya milliy agentligi hamda Sog‘liqni saqlash vazirligi xodimlari Rossiya Federatsiyasi va Qozog‘iston Respublikasida xizmat safarida bo‘lib turibdi.

Yaqin kunlarda Turkiya Respublikasiga ham xizmat safarini amalga oshirish rejalashtirilgan bo‘lib, uning doirasida ota-ona qaramog‘isiz qolgan 30 nafardan ortiq o‘zbekistonlik bolalarni vatanga qaytarish ishlari olib boriladi.

• Ijtimoiy himoya
• O‘zbekistonlik
• Turkiya
• fuqaro