Ukraina davlatiga qarashli “Xochu jit” loyihasi xabariga ko‘ra, Rossiya armiyasi safida Ukrainaga qarshi jang qilgan 481 nafar O‘zbekiston fuqarosi halok bo‘ldi.

“O‘zbekiston fuqarolari bugungi kunda biz aniqlashga muvaffaq bo‘lgan Rossiya Qurolli Kuchlarining xorijiy yollanma askarlari soni bo‘yicha yetakchi hisoblanadi”, — deyiladi xabarda.

Ma’lum qilinishicha, halok bo‘lganlar va bedarak yo‘qolganlar soni bir necha barobar ko‘p bo‘lishi mumkin. “Xochu jit” loyihasi Rossiya armiyasiga yollanib, halok bo‘lgan 481 nafar O‘zbekiston fuqarosining shaxsiga aniqlik kiritgan. 

Shuningdek, Ukrainaga qarshi jang qilgan yoki qilayotgan kamida 2715 nafar O‘zbekiston fuqarosining ism-shariflari e’lon qilingan. Ularning soni yildan yilga ortib bormoqda. Jumladan, 2023-yilda 498 nafar, 2024-yilda yana 941 nafar o‘zbekistonlik Rossiya armiyasi bilan shartnoma imzolagan. 2025-yilning birinchi yarmida esa 1 300 ga yaqin O‘zbekiston fuqarosi Rossiya armiyasi tarkibida urushga yo‘l olgan.

Eslatib o‘tamiz, O‘zbekiston fuqarolariga chet davlatlarining harbiy xizmatiga yollanish taqiqlangan. Jinoyat kodeksining 154-moddasiga ko‘ra, harbiy harakatlarda qatnashish uchun yollanish 10 yilgacha ozodlikdan mahrum etishga sabab bo‘ladi. Urushga odamlarni yollash, ularni o‘qitish va ulardan harbiy harakatlarda foydalanish 12 yilgacha ozodlikdan mahrum qilishga olib keladi. Jinoyat kodeksining 154-1-moddasiga asosan, chet davlatlar harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollangan O‘zbekiston fuqarolari 5 yilgacha ozodlikdan mahrum qilinadi.

• Rossiya
• Ukraina
• Urush