Raqobatni rivojlantirish va iste’molchilar huquqlarini himoya qilish qo‘mitasi propan narxining asossiz oshirilishiga qarshi choralarni kuchaytirmoqda. Bu haqda qo‘mita matbuot xizmati ma’lum qildi.

Xabarda qayd etilishicha, 2025-yilning noyabr–dekabr oylarida bozor ishtirokchilariga ushbu davrda metan gaziga joriy etilgan vaqtinchalik cheklovlardan foydalanib, suyultirilgan gaz narxlarini asossiz oshirmaslik bo‘yicha profilaktik maqsadda ogohlantirishlar yuborilgan.

Shunga qaramay, ayrim xo‘jalik yurituvchi subyektlar tomonidan adolatli bozor tamoyillariga zid ravishda narxlarning sun’iy oshirilishiga olib keluvchi manipulyatsiya va muvofiqlashtirilgan harakatlar alomatlari aniqlangan.

Mazkur holatlar yuzasidan qo‘mita tomonidan belgilangan tartibda qonunbuzilish alomatlari bo‘yicha ish qo‘zg‘atish jarayonlari boshlangan.

Bundan tashqari, birja savdolarida narxlarni barqarorlashtirish maqsadida “korrektirovkalovchi” choralar ko‘rilib, bozor ishtirokchilariga mahsulotlarni birja savdolariga to‘liq hajmda va uzluksiz chiqarish bo‘yicha ko‘rsatmalar berildi.

• Gaz
• Narx-navo