Bugun, 21-fevral kuni soat 05:09 da Toshkent shahrining Uchtepa tumanida joylashgan Izza qurilish bozori hududida eshik va rom mahsulotlari yonayotgani to‘g‘risida xabar kelib tushgan.

Ma’lum qilinishicha, qutqaruv ekipajlari voqea joyiga soat 05:17 da yetib borib, yong‘inni soat 05:38 da qurshab olgan va soat 06:00 da to‘liq bartaraf etgan. Bu haqda poytaxt FVB axborot xizmati xabar berdi.

Yong‘in oqibatida tan jarohati olganlar haqida ma’lumot kelib tushmagan. Hozirda yong‘in sababi hamda yetkazilgan moddiy zarar miqdori aniqlanmoqda.

Yong‘in o‘chirish ishlarini nazorat qilish maqsadida O‘zbekiston Favqulodda vaziyatlar vazirligi rahbari A. Ikramov voqea joyiga yetib borib, vaziyatni shaxsan nazoratga olgan.

Dastlabki ma’lumotlarga ko‘ra, yong‘in natijasida bozor hududidagi 200 kvadrat metr maydonda joylashgan rom va eshik mahsulotlari yonib zararlangan. Qutqaruvchilarning tezkor harakati tufayli bozorning 2000 kvadrat metr maydoni saqlab qolingan.

Shuningdek, joriy yilning 16-fevral kuni mazkur bozor Davlat yong‘in nazorati organi tomonidan tekshiruvdan o‘tkazilgan. Tekshiruv davomida yong‘in xavfsizligi qoidalariga oid bir qator kamchiliklar aniqlanib, ular bartaraf etilgunga qadar bozor faoliyati vaqtincha to‘xtatilgan hamda 3 kun muddatga elektr ta’minotidan uzilgan.

“Bozor ma’muriyati aniqlangan kamchiliklarni bartaraf etish bo‘yicha kafolat xati taqdim etgan. Biroq, afsuski, ushbu qoidabuzarliklar o‘z vaqtida to‘liq bartaraf etilmagani oqibatida yong‘in kelib chiqqan”, – deyiladi xabarda.

• Bozor
• FVB
• Toshkent
• yong‘in