Rossiyada 4 oy davomida maoshsiz va oziq-ovqatsiz qoldirilgan 100 nafardan ortiq o‘zbekistonlik ishchining muammosi hal etila boshladi. Bu haqda Migratsiya agentligi ma’lum qildi.

Aniqlanishicha, ish beruvchilarning umumiy qarzdorligi qariyb 24 million rublni (taxminan 320 ming dollar) tashkil etgan. Ayrim ishchilar esa huquqiy maqomsiz holatda qolib ketgan.

Muammo yuzasidan fuqarolar Migratsiya agentligiga murojaat qilganidan so‘ng, Rossiyadagi vakolatxona tomonidan advokatlar jalb etilib, Bosh konsulxona orqali tegishli idoralarga murojaatlar yuborilgan. Natijada ish beruvchilarga nisbatan jinoyat ishi qo‘zg‘atilgan.

Ko‘rilgan choralar natijasida ishchilarning oziq-ovqat ta’minoti tiklandi hamda 105 nafar fuqaroga 9,4 million rubl (taxminan 125 ming dollar) ish haqi undirib berildi. Qolgan qarzdorlikni 15-mayga qadar to‘lash rejalashtirilgan.

Shuningdek, noqonuniy holatga tushib qolgan fuqarolar vatanga qaytarilib, ularga moddiy yordam ko‘rsatildi.