Sirdaryoda sport anjomlari xarid qilishda 1,2 mlrd. soʻmdan ortiq byudjet mablagʻlari o‘zlashtirildi

2021-yilning dekabr oyida Sirdaryo viloyat turizm va sport Bosh boshqarmasi tomonidan 24 turdagi jami 2612 dona sport anjomlarini xarid qilish uchun 7 ta firma bilan umumiy qiymati 1 mlrd. 976 mln. 778 ming soʻmlik 31 ta shartnoma tuzilgan.

Lekin, Bosh boshqarma hamda firmalarning mansabdor shaxslari oʻzaro kelishgan holda sport anjomlarini sunʼiy qimmatlashtirilgan narxlarda oldi-sottisini amalga oshirishgan.
Aniqlangan holat yuzasidan Davlat xavfsizlik xizmatining Sirdaryo viloyati boʻyicha boshqarmasi tashabbusi bilan oʻtkazilgan sudga oid tovarshunoslik ekspertizasining xulosasiga koʻra, umumiy oʻrtacha bozor qiymati 720 mln. 361 ming soʻmni tashkil etgan sport anjomlari 1 mlrd. 976 mln. 778 ming soʻmga sotib olinib, juda qoʻp miqdordagi byudjet mablagʻlari talon-toroj qilingan.

Hozirda holat yuzasidan Jinoyat Kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari olib borilmoqda.

• Jinoyat
• Sirdaryo