Ayni vaqtga kelib, Oʻzbekistonda Facebook’da 4,7 mln, Instagram’da 3,7 mln, Linkedln’da 288 ming, Telegram’da 18 mln, Odnoklassniki’da 16,7 mln, Twitter’da 51,6 ming va V-kontakte’da 2,6 mln foydalanuvchi mavjud boʻlib, ularning koʻpchiligini yoshlar tashkil etadi.

“.uz” domenidagi veb-saytlarda, fuqarolarning, shu jumladan yoshlarning ongi, ruhiyati, maʼnaviy-maʼrifiy tarbiyasiga salbiy taʼsir koʻrsatadigan, axloqsizlik, behayolik, pornografiya, shafqatsizlik, zoʻravonlik, qimor hamda tavakkalchilikka asoslangan oʻyinlar targʻibotiga xizmat qilishi mumkin boʻlgan materiallar yoki boshqa veb-resurslarga havolalar joylashtirish (foydalanuvchilar tomonidan) holatlari koʻp kuzatilmoqda.

Qayd etilishicha, 2021-yilning dekabr holatiga koʻra milliy domen hududidagi 289 ta veb-saytda pornografiya, 91 ta veb-saytda esa behayolik va maʼnaviy buzuqlikka targʻib qiluvchi holatlar aniqlangan boʻlib, 2 097 ta qonun buzilishi holati qayd etilgan.

Shuningdek, ijtimoiy tarmoqlarning oʻzbek segmentida maʼnaviy buzuqlikni targʻib qiluvchi 130 ga yaqin guruh, sahifa va kanallar mavjudligi aniqlangan, ularda 2 646 ta material (foto, video, matnli va boshqalar) tarqatilgan.

Bundan tashqari, madaniyat sohasida kechayotgan voqealar badiiy film, reklama (jumladan, koʻchalardagi bannerlar), musiqa va kliplarda faqat pul, boylik targʻiboti mavjud. Ayrim hollarda milliy maʼnaviyatga zid koʻrinishlar, sahnalar namoyish etilmoqda.

Ushbu holatlar yuzasidan kecha, 3-fevral kuni oʻtkazilgan Senatning yigirma uchinchi yalpi majlisida soʻz bordi.

Shuningdek, Vazirlar Mahkamasiga jahon axborot tarmogʻida yoshlar va voyaga yetmaganlar uchun milliy kontentni rivojlantirish, ularning ijtimoiy tarmoqlardan foydalanish hamda zararli axborotdan himoya qilish toʻgʻrisida parlament soʻrovi yuborish masalasi koʻrib chiqilgan.

• Pornografiya
• Senat
• veb-sayt