AQSHning Oregon shtatidagi Bend shahrida 15-oktyabr kuni Silver Rail boshlang‘ich maktabida 16 yoshli o‘smir tomonidan sodir etilgan qurolli hujum oqibatida uch nafar bola va bir o‘qituvchi halok bo‘ldi. Hujum qilgan o‘smir esa voqea joyida mahalliy aholi vakili tomonidan otib o‘ldirilgan. Bu haqda Associated Press xabar berdi.

Ma’lum qilinishicha, hujumchi maktab hududiga qulflangan eshiklarga o‘q uzib, bino ichiga kirgan. Halok bo‘lgan bolalarning yoshi 5, 8 va 11 da bo‘lgan. Otishma oqibatida 7 yoshli o‘quvchi va 54 yoshli o‘qituvchi ham og‘ir yaralangan va shifoxonaga yotqizilgan.

Bend shahri politsiyasi boshlig‘i Mayk Kransning aytishicha, hujumchi haqidagi dastlabki xabar kelib tushganidan bir necha daqiqa o‘tib, u maktab ichida o‘lik holda topilgan. Politsiya vakili Sheyla Millerning ma’lum qilishicha, voqea haqida maktab ichidan ham favqulodda xizmatlarga qo‘ng‘iroqlar kelib tushgan. Huquq-tartibot idoralari xodimlari bir necha daqiqa ichida voqea joyiga yetib borgan.

Dastlabki ma’lumotlarga ko‘ra, hujumchi onasi tomonidan sotib olingan nasosli miltiqdan foydalangan. Tergovdan xabardor huquq-tartibot idorasi xodimi bu haqda ismini oshkor qilmaslik sharti bilan ma’lum qilgan.

Politsiya hozircha o‘smirning maktabdagi biror kishini tanigan-tanimagani yoki ushbu ta’lim muassasasida o‘qigan-o‘qimaganini aniqlamagan. Ma’lum qilinishicha, u Bend shahri aholisi bo‘lgan.

Otishmadan keyin o‘quvchilar avtobuslarda yaqin atrofdagi cherkovga olib borilgan va u yerda ota-onalari bilan uchrashgan. Oregon gubernatori Tina Kotek hujumchini to‘xtatishga aralashgan mahalliy aholi vakiliga minnatdorlik bildirib, halok bo‘lganlar, yaralanganlar va ularning oilalariga hamdardlik bildirgan.

Hozircha hujumning sababi va o‘smirning maktab bilan aloqasi bo‘yicha tergov tafsilotlari to‘liq aniqlanmagan.