AQSh Prezidenti Donald Tramp Medicare dasturida ro‘yxatdan o‘tgan 20 milliondan ortiq keksa amerikalikka bir martalik 90 dollarlik to‘lovlar yuborilishini ma’lum qildi. Bu haqda u Truth Social’dagi sahifasida yozdi.

Trampning bildirishicha, to‘lovlarning umumiy qiymati qariyb 2 milliard dollarni tashkil etadi. Mablag‘lar Medicare Part B dasturi bo‘yicha sug‘urta badallarini to‘lashga yordam berishga yo‘naltiriladi.

AQSH prezidenti ma’muriyat to‘lovlarni yuborishni boshlayotganini bildirgan va ularni keksa fuqarolarning tibbiy sug‘urta xarajatlarini qoplashga ko‘mak sifatida izohlagan.

Tramp ushbu to‘lovlar avval e’lon qilingan boshqa dastur bilan bog‘liq emasligini ta’kidlagan. Mazkur dastur doirasida Jo Bayden prezidentligi davrida tibbiy sug‘urta uchun ortiqcha to‘lov qilgan deb hisoblangan qariyb 1 million amerikalikka 500 dollardan qaytarilishi ko‘zda tutilgan.

Shuningdek, Tramp noyabr oyida bo‘lib o‘tadigan Kongress saylovlarida Respublikachilar partiyasi Vakillar palatasi va Senatda nazoratni saqlab qolsa, AQSHning barcha katta yoshli fuqarolariga 5 ming dollardan to‘lash rejasini yana bir bor ilgari surgan. Uning aytishicha, bunday to‘lovlar davlat budjetiga 1 trillion dollardan ortiq mablag‘ talab qilishi mumkin.