Uchrashuvda ma’rifatparvar Mahmudxo‘ja Behbudiyning “Maktab – taraqqiyotning boshlang‘ichi, madaniyat va saodatning darvozasidir” degan so‘zlari yodga olindi. Prezident o‘g‘il-qizlar uchun ushbu “darvoza”ni yanada keng ochish va ularning iqtidorini ro‘yobga chiqarish Uchinchi Renessans g‘oyasining o‘zagi ekanini ta’kidladi.

Sun’iy intellekt va raqamli texnologiyalar rivojlanishi natijasida yangi kasblar paydo bo‘layotgani, mavjud kasblar esa yangi ko‘nikmalarni talab qilayotgani qayd etildi. “Bolani maktabdan kasb, til o‘rgatmasdan chiqarish – uning kelajagiga beparvolik emasmi?” — dedi Shavkat Mirziyoyev.

Maktab direktorlariga o‘quvchilar qaysi til va kasbni o‘rganayotgani, maktabni bitirgach qanday hunarga ega bo‘lishi masalalariga jiddiy e’tibor qaratish vazifasi yuklatildi. Maktab rahbarlariga zarur vakolatlar berilishi, hamkorlikka tayyor tadbirkorlar uchun sharoit yaratilishi ma’lum qilindi. Yoshlarni maktabdanoq kasbga tayyorlash va ta’lim bosqichlari uzviyligini ta’minlash uchun komissiya tuziladi hamda uch oy ichida yangi yechimlar e’lon qilinadi.