Huquq-tartibot organlari tezkor bo‘linmalari hamkorligida aprel oyida uyushgan narko-jinoyatchilik va uyushgan jinoiy guruhlarga qarshi keng ko‘lamli tezkor tadbirlar amalga oshirildi.

Natijada narkotik moddalarni tarqatish bilan shug‘ullangan 13 ta uyushgan narko-jinoiy guruh faoliyatiga chek qo‘yilib, 2 nafar guruh yetakchisi va 35 nafar a’zosi qo‘lga olindi. Shuningdek, 4 ta yashirin narkolaboratoriya, 1 ta internet narkodo‘koni fosh etildi hamda xalqaro darajadagi nazorat ostida yetkazib berish tadbiri o‘tkazildi.

Tezkor tadbirlar davomida 285 kg an’anaviy narkotik moddalar, 410 ming dona psixotrop dori vositalari hamda 42 litr noqonuniy prekursorlar musodara qilindi. Mutaxassislar xulosasiga ko‘ra, ushbu jinoiy tarmoqlar orqali bir yil davomida 2,6 mln dona psixotrop vosita, 1,4 tonna “gashish” va “opiy”, shuningdek, sintetik narkotiklar noqonuniy tarqatilishi mumkin edi.

Shuningdek, uyushgan guruhiy jinoyatchilikka qarshi kurash yo‘nalishida 10 ta yirik jinoiy guruh faoliyatiga barham berilib, 10 nafar yetakchi va 50 nafar a’zo ushlandi. Ular 17 ta shahar va tumanda tadbirkorlarga bosim o‘tkazish, talonchilik, bezorilik, o‘g‘rilik va og‘ir tan jarohati yetkazish kabi jinoyatlarni sodir etib kelgan.

Tezkor tadbirlar doirasida Tojikiston Respublikasi bilan hamkorlikda xalqaro tezkor operatsiya ham amalga oshirildi.

• Chegara
• DXX
• Giyohvandlik
• IIV
• Tojikiston