AGMK futbol klubi “Dinamo” Tbilisi jamoasining koʻp yillik sardori — Giorgi Papava bilan yarim yillik shartnoma imzoladi.

Faoliyatini “Dinamo” Tbilisida boshlagan, keyinchalik Kiprning “Nea Salamina” jamoasida oʻynagan va Gruziyada “Dila Gori” hamda “Rustavi” klublarida ham toʻp tepgan Papava oxirgi 4 mavsumni “Dinamo” Tbilisida jamoa sardori sifatida oʻtkazdi.

Futbolchi u yerda 4 marotaba Gruziya chempionligiga erishib, 3 bor mamlakat kubogini qoʻlga kiritgan. Giorgi Papava Chempionlar ligasi, Yevropa ligasi va Konferensiyalar ligasida maydonga tushgan.

Maʼlumot oʻrnida, Papava faoliyati davomida 267 oʻyin oʻtkazgan va raqiblari darvozasiga 7 marotaba gol urgan.

Bundan tashqari, AGMK safini legioner futbolchi, moldovalik — Dan Spataru toʻldiradi. AGMK futbol klubi erkin agent maqomida kelgan Dan Spataru bilan 1 yillik shartnoma imzoladi.

Spataru Moldova terma jamoasi aʼzosi sanaladi. Futbolchi joriy mavsum Moldovaning “Milsami” jamoasiga oʻtib, Yevropa Konferensiya ligasi saralash bosqichida 4 uchrashuvda harakat qilgan va 2 ta gol muallifiga aylangan.

28 yoshli qanot vingeri faoliyati davomida Moldova, Ruminiya, Armaniston premyer ligasida chempionlikni erishgan hamda oʻynagan ligalarida mamlakat kubogi va superkubogini ham qoʻlga kiritgan sovrindor futbolchi hisoblanadi.

Shuningdek, klub erkin agent maqomidagi Shahzod Suyunov bilan ham 2,5 yillik shartnoma imzoladi.

22 yoshli iqtidorli darvozabon faoliyatini “Nasaf” akademiyasida boshlagan va 2020-yilgi mavsumdan eʼtiboran asosiy jamoa aʼzosiga aylangan.

• AGMK
• Futbol
• Transferlar