Afg‘oniston Amudaryoning suv resurslaridan foydalanish huquqiga ega va mamlakat qo‘shnilari bilan suvdan foydalanish bo‘yicha hech qanday kelishuvga ega emas. Bu haqda "Tolibon" hukumati energetika va suv resurslari vaziri vazifasini bajaruvchi Abdul Latif Mansur ma’lum qildi.

“O‘z xavotirlarini bildirganlar kelishuv asosida shunday qilishlari kerak, ammo Afg‘onistonda suv resurslari bo‘yicha hech qanday kelishuv yo‘q. Hozirgi vaziyatda Amudaryo havzasi bo‘yicha kelishuvlarimiz yo‘q”, – dedi u Qo‘shtepa kanali qurilishi bilan bog‘liq xavotirlarga izoh berarkan.

Vazirning so‘zlariga ko‘ra, Afg‘onistonning amaldagi rasmiylari qo‘shni davlatlarning qo‘rquvini yo‘qotish uchun Amudaryo suvi masalasini muhokama qilishga tayyor.

Prezident Shavkat Mirziyoyev yaqinda Dushanbeda bo‘lib o‘tgan Orolni qutqarish xalqaro jamg‘armasi ta’sischilari davlat rahbarlari kengashining yig‘ilishida so‘zlagan nutqida Afg‘onistondagi Qo‘shtepa kanali Markaziy Osiyodagi suv balansini tubdan o‘zgartirishini ta’kidladi. Uning qurilishi tufayli mintaqada suvdan foydalanish jarayonining yangi ishtirokchisi paydo bo‘ldi, bu boshqa davlatlar oldidagi majburiyatlar bilan bog‘liq emas, dedi u.

O‘zbekiston Prezidenti kanalning Amudaryoning suv rejimiga ta’sirini o‘rganish bo‘yicha qo‘shma ishchi guruh tuzish, shuningdek, Afg‘onistonni suvdan birgalikda foydalanish bo‘yicha mintaqaviy muloqotga jalb etish imkoniyatlarini ko‘rib chiqishni taklif qildi.

2022-yilda Afg‘oniston shimolida Amudaryodan suv olish uchun Qo‘shtepa sug‘orish kanali qurilishi boshlandi. Mutaxassislarning fikricha, kanal O‘zbekiston va Turkmanistonda suv tanqisligini oshiradi.

• Afg‘oniston
• Amudaryo