Andijonda 200 mln so‘mlik taqinchoqlarni ichki a’zolariga yashirib olib kirmoqchi bo‘lgan uch ayol qo‘lga tushdi, deb xabar bermoqda viloyat bojxona boshqarmasi axborot xizmati.

Qayd etilishicha, Andijon aeroportida xalqaro yo‘nalishlar bo‘yicha parvozlar yo‘lga qo‘yilishi bilan birga, bojxona nazorati jarayonida qonunbuzarliklarning oldi olinmoqda. Xususan, Istanbul–Andijon yo‘nalishi bilan uchib kelgan bir guruh yo‘lovchilar bojxona xodimlarida shubha uyg‘otgan. Belgilangan tartibda o‘tkazilgan shaxsiy ko‘rik davomida uch nafar ayol tomonidan umumiy og‘irligi 225,3 gramm bo‘lgan tayyor zargarlik buyumlarini ichki a’zolariga yashirgan holda olib kirishga uringani aniqlangan.

Ayni paytda mazkur holat yuzasidan belgilangan tartibda protsessual hujjatlar rasmiylashtirildi. Dastlabki baholashga ko‘ra, ushlab qolingan taqinchoqlarning qiymati 200 million so‘mni tashkil etadi. Taqinchoqlar vaqtincha saqlovga olingan.

O‘zbekistonda o‘n oyda yashirin iqtisodiyotga qarshi kurashish doirasida 34,6 mingta holatda qariyb 1 trln so‘mlik tovarlar, jumladan 73,3 mlrd so‘mlik valyuta qimmatliklari, 114,1 mlrd so‘mlik zargarlik buyumlarining noqonuniy aylanmasiga chek qo‘yildi.

• Andijon
• Ayollar
• Bojxona
• tekshiruv