Anor o‘zbeklar xush ko‘rib iste’mol qiladigan foydali mevalardan biridir. Uning o‘zi ko‘plab dardlarga davo, quvvat va shifo manbayi bo‘lsa, undan tayyorlanadigan tabiiy anor suvi esa insonning immun tizimini faollashtiradi, ishtahani ochadi, tetiklashtirib, ortiqcha uyqudan xalos etadi.

Unda, C, K, B6 va B9 vitaminlari va 15 ta aminokislota mavjud. Anor kaliy, mis, fosfor, magniy, yod va temir kabi minerallarga boy. Anordagi temir moddasi yaxshi singdiriladi. Aynan shuning uchun kamqonlikda bir kunda kamida bir piyola anor suvini ichish tavsiya qilinadi.

Olimlar anor xolesterin miqdorini kamaytirishini va qon tomirlaridagi toshmalarga qarshi kurashishini aniqlashgan. Shuningdek, u yurakni mustahkamlovchi quvvatga ega. Meva qarishdan himoya qiladi. Undagi A urolitin moddasi organizmni yosh holatda saqlaydi.

Bilasizmi, anor saratonga qarshi xususiyatlarga ega. Uning tarkibida organizmda xavfli o‘smalar paydo bo‘lishiga qarshilik ko‘rsatuvchi ellagotanin moddasi mavjud. Anorni yoki suvini har kuni iste’mol qilish saraton kasalliklariga chalinish ehtimolini bir necha marta pasaytiradi.

Gemoglobin – tarkibi temirdan iborat oqsil hisoblanadi. Gemoglobin yetishmasligida odam ko‘ngil aynish, zaiflik va tez charchashni his qilishi mumkin. Agar sizda gemoglobin miqdori kam bo‘lsa, har kuni 150-200 ml.dan yangi siqilgan anor sharbatini ichish lozim.

• Meva
• anor sharbati