Bloomberg nashrining taniqli insayderi Mark Gurman Apple ikkita mutlaqo yangi qurilmani tayyorlayotganini aytdi: aqlli ko‘zoynaklar hamda kameralar o‘rnatilgan birinchi AirPods quloqchinlari. Tahlilchining fikricha, kompaniya qurilmalarni 2027-yilgacha taqdim etishi mumkin.

Apple’ning aqlli ko‘zoynagi kameralar, mikrofonlar va dinamiklar bilan jihozlanadi. Linzalar kunduzgi yorug‘likda quyoshdan himoyalovchi ko‘zoynakka aylanib, atrof-muhitga moslashishi mumkin. Shuningdek, ko‘zoynak Siri’ni qo‘llab-quvvatlashi ehtimoli bor. Mini-proyektor esa foydalanuvchining ko‘z oldida ob-havo ma’lumotlari, rejalashtiruvchi, yo‘l ko‘rsatuvchi va boshqa shu kabi axborot vidjetlarini aks ettira oladi.

2027-yilgacha kutilayotgan yana bir qiziqarli qurilma — tashqariga yo‘naltirilgan kameralari bor birinchi simsiz AirPods quloqchinlari. Quloqchinlar atrofdagi muhitni o‘qiy olishi mumkin, bu ayniqsa ko‘rish qobiliyati cheklangan odamlar uchun juda foydali bo‘ladi. Hozircha garnituralar uchun kameralarning boshqa maqsadlari noma’lum. Apple ularni Apple Intelligence sun’iy intellekt funksiyalari bilan qandaydir tarzda bog‘lash ehtimoli mavjud.Insayderning aytishicha, Apple hozircha vizual intellekt funksiyalarini joriy etish uchun qurilmaning shakl-shamoyili ustida tajribalar o‘tkazmoqda. Shu sababli, quloqchinlarning funksiyalari haqida gapirishga hali erta.

• Apple
• Bloomberg
• Lifestyle
• texnologiya