“Apple” o‘zining “AirPods” qurilmalarini eshitish vositalariga aylantirishni rejalashtirmoqda. Bu haqda taniqli insayder va “Bloomberg” sharhlovchisi Mark Gurman ma’lum qildi, deb yozmoqda “MacRumors” nashri.

Gurmanning so‘zlariga ko‘ra, “Apple” hozirda “AirPods” imkoniyatlarini kengaytirish ustida ishlamoqda. Qayd etilishicha, ular to‘laqonli tibbiy qurilmaga aylanishi mumkin. Kompaniya eshitishida muammolari bo‘lgan odamlar uchun foydali bo‘lgan eshitish vositasi yaratishni rejalashtirgan. Qo‘shimcha funksiyalar kompaniyaning yangi qurilmalarida bir yoki ikki yil ichida paydo bo‘lishi mumkin.

“AirPods”da allaqachon qisman qurilmadan eshitish vositasi sifatida foydalanish imkonini beruvchi variantlar mavjud”, – deya eslatadi Gurman.

Masalan, suhbat davomida ovozni kuchaytirish. Biroq, ular tibbiy anjomlar sifatida sertifikatlanmagan. Xabarlarga ko‘ra, “Apple”, aftidan, sog‘liqni saqlash olamiga ham kirib bormoqchi.

Yana bir nufuzli insayder Ming-Chi Kuo avvalroq “Cupertino” kompaniyasi “naushnik”lardan tibbiy asbob sifatida foydalanishga oid bir qancha patentlarni olgani haqida xabar bergan edi. Ular orasida quloqchinda yashiringan datchiklar yurak urishi, tana harorati va terlash darajasi haqida ma’lumot to‘playdi.

Eslatib o‘tish mumkin, “AirPods” bu “Apple” kompaniyasi tomonidan ishlab chiqilgan simsiz “Bluetooth” quloqchinlaridir. Ular birinchi marta 2016-yil 7-sentyabrda “iPhone 7” bilan birga e’lon qilingan. Ikki yil ichida ular Stiv Jobs asos solgan kompaniyaning eng mashhur aksessuarlaridan biriga aylandi. Eng so‘nggi model “AirPods” (3-avlod) 1 va 2-avlod modellarining o‘rnini bossa-da, ikkinchi avlod qurilmalari ham kompaniya veb-saytida hali ham mavjud.

Ovozni ijro etishdan tashqari, “AirPods” fon shovqinini filtrlaydigan mikrofon, shuningdek, teginish va quloq ichidagi joylashuvni aniqlashga qodir o‘rnatilgan akselerometrlar va optik sensorlarni o‘z ichiga oladi. Audio chiqarib olinganda esa avtomatik pauza qilish funksiyasi ishga tushadi.

• Apple
• texnologiya