Kecha, 1-sentabr kuni Argentinada vitse-prezident Kristina Kirshnerga suiqasd uyushtirildi. Bu haqda “Kommersant” xabar berdi.

Qayd etilishicha, voqea uning uyi yaqinida o‘ziga tarafdor bo‘lgan insonlar bilan muloqot chog‘ida sodir bo‘lgan. Jinoyatchi unga qarata qurol ko‘rsatib, tepkini bosgan, ammo to‘pponcha otilmagan. U xavfsizlik xizmati xodimlari tomonidan hibsga olingan.

Dastlabki ma’lumotlarga ko‘ra, erkak 35 yoshli Braziliya fuqarosi Fernando Andres Sabag Montiyel ekanligi aniqlangan.

Ma’lumotlarga ko‘ra, u “Bersa Thunder 380” avtomatik o‘qlanuvchi to‘pponcha bilan qurollangan bo‘lgan. Ushbu shaxs bunga qadar 2021-yilda polisiya uning mashinasidan pichoq topib olgani sababli sudlangan.

Argentina prezidenti Alberto Fernandes Kristina Kirshnerga suiqasd uyushtirilganini rasman ma’lum qildi va buni “demokratiya tiklanganidan buyon eng yomon voqea” deb atadi. Shuningdek, mamlakatda 2-sentabr dam olish kuni, deb e’lon qildi.

• Argentina
• Prezident
• suiqasd