Ommaviy axborot vositalarining xabar berishicha, 7-mayga o‘tar tunda Kashmirning Pokistonga qarashli qismida portlashlar yuz berdi. Guvohlarning so‘zlariga ko‘ra, yarim tundan keyin Muzaffarobod shahri atrofiga raketa zarbalari berilgan. Portlashlardan keyin shaharda elektr energiyasi ta’minoti uzilgan.

Hindiston Pokistondagi “terrorchilik” infratuzilmalariga qarshi zarbalari berganini e’lon qildi. Ta’kidlanishicha, Hindiston “Sindur operatsiyasi” doirasida to‘qqizta obyektga hujum qilgan.

“Hindiston Qurolli kuchlari terrorchilar lagerlariga aniq zarbalarni amalga oshirdi. Pokiston harbiy obyektlari hujumga uchramadi”, – deyiladi Hindiston Mudofaa vazirligi bayonotida.

Pokiston Mudofaa vazirligi Hindiston mamlakat hududiga raketa zarbalari yo‘llaganini tasdiqladi. Shu bilan birga, Pokiston “tegishli javob choralari ko‘rilishini” ta’kidladi. Pokiston o‘z havo makonini barcha parvozlar uchun 48 soatga yopdi.

Pokiston va Hindiston o‘rtasidagi munosabatlar 22-aprel kuni Hindistonning Jammu va Kashmir shtatidagi Pahalgam shahrida qurollangan terrorchilar 26 kishini o‘ldirishi sababli yana keskinlashdi. Ushbu terakt uchun Kashmirning Pokiston nazorati ostidagi hududida joylashgan terrorchilik guruhi javobgarlikni o‘z zimmasiga oldi. Hindiston hukumati hodisa yuzasidan aybni Pokistonga yukladi. Mazkur hodisadan so‘ng Hindiston Pokiston bilan chegarani yopdi va Pokiston fuqarolaridan mamlakatni tark etishni talab qildi. O‘z navbatida Pokiston ham shunday javob choralarini ko‘rdi.

• Hindiston
• Pokiston
• Raketa
• hujum