Deyv Bautista va Rupert Grint ishtirokidagi “Eshikni taqillating” filmi treyleri namoyish etildi.

Qayd etilishicha, Nayt Shyamalan (“Split”, “Vaqt” filmi orqali tanilgan) rejissyorligidagi yangi dahshatli filmning treyleri “You Tube” platformasiga joylangan.

Kartinada bosh qahramon ta’til vaqti olis makonda bo‘lganida, kichkina qizi va uning yaqinlari qurollangan to‘rt nafar notanish kishi tomonidan garovga olinadi. Jinoyatchilar ularga tanlov taqdim etadi: apokalipsisning (adabiy janr bo‘lib, unda g‘ayritabiiy mavjudot inson vositachisiga kosmik sirlarni yoki kelajakni ochib beradi) oldini olish uchun kimdir o‘lishi kerak bo‘ladi.

Rejissyorning ta’kidlashicha, film syujeti “juda tarang” bo‘ladi, ammo tafsilotlar ma’lum bir nuqtaga qadar sir saqlanadi.

Filmda bosh rollarni Deyv Bautista, Rupert Grint, Jonatan Groff, Ben Eldrij, Nikki Amuka-Byord va Ebbi Kuinn ijro etgan. Film ssenariysi Shyamalan tomonidan yozilgan. Loyiha joriy yilning 3 fevral kuni premyera qilinishi kutlmoqda.

Qayd etish mumkin, 53 yoshli Bautistani o‘zbek kinomuxlislari juda yaxshi tanishadi. U ishtirok etgan “Riddik”, “Spektr”, “Temir musht”, “Risar”, “Galaktika qo‘riqchilari”, “Tig‘ ostidagi poyga; 2049” va “Qochish rejasi” kabi filmlar ommalashgan.

U shuningdek, shoulashgan yakkakurash (WWE) bo‘yicha faoliyatini 1999-yilda boshlagan va 2000-yilda Jahon kurash federasiyasi (WWF, 2002- yilda nomi WWE’ga o‘zgartirgan) bilan shartnoma tuzgan. 2002-yildan 2010-yilgacha u “Batista” nomi ostida shuhrat qozondi va olti karra jahon chempioni bo‘ldi, to‘rt marta og‘ir vazn toifasida jahon chempioni va ikki marta WWE unvonini sohibiga aylandi. Aynan ushbu janglarni o‘zbek tomoshabinlari yaxshi eslaydi.

Rupert Grint esa britaniyalik kino va televideniye aktyori. U yozuvchi Joan Rouling asarlari asosida suratga olingan Garri Potter filmlaridagi Ron Uizli roli bilan mashhur.

• Kino
• Netflix
• gollivud