Polsha Milliy mudofaa vazirligi mamlakatning urush va zamonaviy xavfsizlik tahdidlariga to‘liq tayyorgarligini ta’minlashga qaratilgan yangi qonun loyihasini ishlab chiqmoqda. Bu haqda Rzeczpospolita xabar berdi.

Vazirlik ma’lumotlariga ko‘ra, hujjat Polshaning mudofaa qobiliyatini kuchaytirish, qurolli kuchlar hamda ichki xavfsizlik uchun mas’ul xizmatlar o‘rtasidagi hamkorlikni yaxshilash va amaldagi qonunchilikni zamonaviy tahdidlarga moslashtirishni ko‘zda tutadi. Ular qatorida gibrid tahdidlar, kiberhujumlar va dezinformatsiya ham bor.

Qonun loyihasi qo‘shinlarni, jumladan, ittifoqchi kuchlarni zarur hollarda tezkor qayta joylashtirish imkoniyatlarini kengaytirishi kutilmoqda. Shuningdek, Polshaning mudofaa bo‘yicha harakat rejalarini NATOning tegishli tizimlari bilan muvofiqlashtirish va zarur infratuzilmani oldindan tayyorlash ko‘zda tutilgan.

Hujjatda davlat mudofaasini boshqarishda ishtirok etadigan idora va muassasalar ro‘yxatini kengaytirish ham rejalashtirilgan. Bundan tashqari, doimiy navbatchilik tizimi, operativ rejalashtirish, mudofaa dasturlari va tegishli mashg‘ulotlarni tashkil etish tartibiga o‘zgartirishlar kiritilishi mumkin.

Mudofaa vazirligi hozirda davlat mudofaasiga tayyorgarlik va uni boshqarish bo‘yicha vakolatlar Vazirlar Kengashining turli qarorlari bilan tartibga solinishini qayd etgan. Yangi qonun ushbu masalalarni yagona huquqiy asosga keltirishga qaratilgan.

Qonun loyihasi hozircha vazirlikda ishlab chiqish bosqichida. Uni Polsha Seymiga qachon kiritish masalasi hozircha ma’lum emas. Milliy xavfsizlik byurosi ham hujjatning yakuniy yo‘nalishlari bilan tanishishni kutmoqda.

Polsha mudofaa vaziri Vladislav Kosinyak-Kamish qonunchilikka o‘zgartirish kiritish zaruratini mamlakat chegaralari yaqinida raketa va dronlar bilan bog‘liq hodisalar ko‘paygani bilan izohlagan.

Avvalroq Latviya NATO doirasida jamoaviy qaror qabul qilinsa va zarurat tug‘ilsa, o‘z hududida yadroviy qurol joylashtirish imkoniyatini ko‘rib chiqishi mumkinligi haqida xabar berilgan edi.