Turkmanistonda o‘zbekistonlik “kriminal avtoritet”, ayni vaqtda hibsda saqlanayotgan “Baxti Tashkentskiy”ning do‘sti qo‘lga olindi. Bu haqda “Xronika Turkmenistana” internet-nashri xabar berdi.

Ma’lum qilinishicha, Baxtiyor Qudratullayev va uning do‘stlari “Dolzarb 40 kunlik” tadbiri doirasida qo‘lga olingandan so‘ng, jinoiy guruh a’zolaridan biri 7-dekabr kuni Turkmaniston bilan chegarani noqonuniy kesib o‘tib, qochishga muvaffaq bo‘lgan.

Turkmaniston Milliy xavfsizlik vazirligiga qochqinning qo‘lga olingan guruh a’zosi Nargiza Jumaniyozovaning singlisi Bibijon Jumaniyozovaning uyida ekanligi haqida ma’lumot berilgan.

Tezkor qidiruv natijasida erkak qo‘lga olingan, so‘ngra “Shovot” chegara bojxona postida O‘zbekiston maxsus xizmatlariga topshirilgan. Bibijonning uyidan jinoiy guruh a’zosidan tashqari O‘zbekistonda ishlab chiqarilgan 12 quti dori vositalari topilgan.

Aniqlanishicha, ayol dori vositalari kontrabandasi bilan shug‘ullangan. Ayni vaqtda unga nisbatan jinoiy ish qo‘zg‘atilgan. Eslatib o‘tamiz, “Baxti Tashkentskiy” nomi bilan tanilgan Baxtiyor Qudratullayev joriy yilning dekabr oyida qo‘lga olingandi.

• IIB
• JK
• Turkmaniston