AQSh prezidenti Donald Tramp Kanada tovarlariga nisbatan bojlarni qo‘shimcha 10 foizga oshirdi. Bu haqda u o‘zining Truth Social sahifasida ma’lum qildi.

Qo‘shimcha 10 foizlik boj “hozir to‘layotganlaridan tashqari” qo‘llanadi. Bu Kanada bilan savdo muzokaralari tugaganidan atigi ikki soat o‘tgach, joriy etilmoqda.

Tramp boj oshishiga Kanadaning Ontario provinsiyasi hukumati tomonidan e’lon qilingan reklama sabab bo‘lganini aytdi. Mazkur reklamada respublikachilar ramzi bo‘lgan marhum prezident Ronald Reygan tasvirlangan. Videoda u bojlar savdo urushlari va iqtisodiy falokatga olib kelishi haqida gapirgan.

Reygan jamg‘armasi Kanada “prezidentning audio va videolarini tanlab ishlatgani”ni ma’lum qildi. Jamg‘arma ma’lumotiga ko‘ra, reklama Reyganning radio orqali qilgan chiqishini buzib ko‘rsatgan va Kanada taraf bu materiallardan foydalanish hamda ularni tahrirlash uchun ruxsat olmagan.

“Ronald Reygan milliy xavfsizlik va iqtisodiyot maqsadlari uchun boj tariflarini juda yoqtirardi, lekin Kanada buning aksi ekanini aytdi! Ularning reklamasi darhol olib tashlanishi kerak edi, ammo ular buni firibgarlik ekanini bila turib, kecha kechqurun Jahon chempionati paytida namoyish etishdi. Ularning faktlarni jiddiy ravishda noto‘g‘ri talqin qilgani va dushmanona xatti-harakatlari tufayli, men Kanadaga nisbatan bojxona tarifini ular hozir to‘layotganidan 10 foizga oshiryapman”, – dedi Tramp.

• AQSh
• Kanada
• Tramp