AQSh davlat kotibi Entoni Blinken birinchi Xalqaro islomofobiyaga qarshi kurash kunida Qo'shma Shtatlar odamlarning o'z vijdoniga ko'ra yashash huquqini himoya qilishda davom etishini aytdi.

Oʻtgan yili Birlashgan Millatlar Tashkiloti 15-martni Xalqaro islomofobiyaga qarshi kurash kuni deb eʼlon qilgan edi. Shuningdek, kecha, 15-mart kuni Yangi Zelandiyaning Kraystcherch shahridagi ikkita masjidga qilingan hujumlarga to‘rt yil to‘ldi. O‘sha kuni otishma oqibatida ikki masjidda 51 musulmon namozxon o‘ldirilgan, yana 40 nafari yaralangan.

“Bu kuni biz butun dunyo boʻylab oʻzini musulmon deb koʻrsatgani, amal qilgani yoki Islomni qabul qilgani yoki musulmon sifatida qabul qilingani uchun taʼqibga uchragan, hibsga olingan, qamoqqa olingan yoki hatto oʻldirilayotgan odamlarga eʼtibor qaratamiz", – deyiladi Blinkenning Davlat departamenti tomonidan e'lon qilingan bayonotida.

Blinkenning ta'kidlashicha, Qo'shma Shtatlar odamlarning o'z vijdoni amriga ko'ra yashash huquqini himoya qilishda davom etadi va uni inkor etganlar nomidan gapiradi.

"Har kim qayerda bo'lishidan qat'i nazar, fikrlash, vijdon, din va e'tiqod erkinligi, shu jumladan o'z e'tiqodini o'zgartirish yoki (Xudoga) ishonmaslik erkinligi huquqiga ega” – deydi u.

AQSh davlat kotibi barchani Islom diniga nisbatan nafratga qarshi kurashishga chaqirdi.

“Dunyo boʻylab musulmonlar muqaddas Ramazon oyiga, roʻza tutish va jamiyatlarga gʻamxoʻrlik qilish vaqtiga tayyorgarlik koʻrayotgan ekan, keling, bu yerda AQSh va xorijda bu nafratga qarshi kurashaylik”, dedi u.

• Entoni Blinken
• Islom
• Kurash