BMT Bosh Assambleyasi Nyu-York shahrida bo‘lib o‘tgan yig‘ilishda Ukrainada tinchlikni qo‘llab-quvvatlash haqidagi rezolyutsiyani qabul qildi. “Ukrainada barqaror tinchlikni qo‘llab-quvvatlash” deb nomlangan rezolyutsiya uchun 107 davlat ovoz berdi, 12 davlat qarshi chiqdi, 51 mamlakat betaraf qoldi.

Rossiya, Belarus, Burkina-Faso, Burundi, Kuba, Shimoliy Koreya, Eritreya, Eron, Mali, Niger, Nikaragua va Sudan unga qarshi ovoz berdi.

Qozog‘iston, Qirg‘iziston, Tojikiston va O‘zbekiston 51 ta betaraf davlat qatoridan joy oldi. Turkmaniston esa ovoz berishda umuman ishtirok etmadi.

Rezolyutsiya matnida Ukrainaning mustaqilligi, suvereniteti va hududiy yaxlitligi qo‘llab-quvvatlanishi bildirilgan. AQSh loyiha matnidan aynan suverenitet va hududiy yaxlitlik, shuningdek BMT Nizomiga oid ikki bandni olib tashlashni taklif qilgandi. Biroq davlatlar AQSh taklifi bo‘yicha ovoz berishni rad etgan va rezolyutsiya birinchi ko‘rinishda qabul qilingan.

• BMT
• Ukraina