Nasliy va kasbiy omillar, ekologik muammolar, semizlik, noto‘g‘ri ovqatlanish, turli mikroorganizm va allergenlardir. Bular — bronxial astma xastaligini keltirib chiqaruvchi sabablar ro‘yxatida yetakchi. Ammo bolalarda mazkur xastalikni yuzaga keltiruvchi yana bir muhim faktor bor. Buni Avstraliyaning Kvinslend universiteti olimlari aniqladi. Qayd etilishicha, ota-onalardagi davomli ruhiy tushkunlik kelgusida ularning farzandlarida astma xastaligini paydo qilishi mumkin. Bu haqda SSV matbuot xizmati xabar beryapti.
Ushbu ilmiy xulosani jamoatchilikka taqdim etish uchun 14 yil zarur bo‘ldi. Uzoq yillik tadqiqot davomida mamlakatda yashovchi 3900 nafardan ortiq bolalarga tegishli tibbiy maʼlumotlar tahlil qilindi.
“O‘rganishlar yakunida ota-onalari o‘rta va yuqori darajada stressni boshdan kechirgan o‘g‘il-qizlarda 77 foiz ko‘proq nafas qisishi va hansirash xurujlari kuzatilishi maʼlum bo‘ldi”, – deyiladi xabar.
Alohida mezonlar bo‘yicha tahlil qilinganda, onalaridagi depressiya tufayli farzandlarida astmaga chalinish ehtimoli 55 foizga ortishi aniqlandi.
Shuningdek, ota-onalari o‘rtacha moliyaviy qiyinchiliklarga ro‘baro‘ kelgan oilalarda dunyoga kelgan o‘g‘il-qizlarda bu ko‘rsatkich 40 foizdan ko‘proqni tashkil etgan.
Eslatib o‘tamiz, hozirgi kunda dunyo bo‘yicha o‘rtacha 5 foiz aholi bronxial astma tashxisi bilan yashamoqda. Bolalar o‘rtasida bu statistika yana-da yuqori — 10 foizga teng.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!