Bugun, 1-oktabr kuni Ukraina Qurolli Kuchlari Donesk viloyatining Liman shahri atrofidagi beshta aholi punktini ozod qildi. Sharqiy kuchlar guruhi vakili Sergey Cherevatiyning aytishicha, Yampol, Novoselovka, Shandrigolovo, Drobishevo, Stavki ozod qilingan. Shuningdek, Limandagi Rossiya harbiylari to‘liq qurshab olingan.

Shu munosabat bilan, Ukraina Respublikasi prezidenti Volodimir Zelenskiy o‘z Telegram kanalida chiqish qilib, bugungi natijalar mamlakat uchun qanchalik muhum ahamiyatga ega ekanini ma’lum qildi.

 “Mamlakatimiz sharqida salmoqli natijalarga erishdik. Bu haqda jamoatchilik tomonidan allaqachon yetarlicha ma’lumotlar mavjud. Donetsk viloyatining Liman shahrida nimalar bo‘layotganini hamma eshitgan. Bu biz uchun katta ahamiyatga ega qadamlar.

Mudofaa rejamizning ushbu elementini amalga oshirgan barcha jangchilarimizga minnatdorchilik bildiraman! Bu juda muhim”,– deydi Ukraina rahbari.

Shuningdek, Ukraina prezidenti mamlakat faqat bu natija bilan to‘xtab qolmay, balki butun hududini qaytarib olishi kerakligini aytgan.

“Biz butun yerimizni ozod qilishimiz kerak va bu xalqaro huquq va insoniy qadriyatlarni hech bir terrorchi davlat, hatto Rossiyadek beadab davlat ham buzolmasligining eng yaxshi isboti bo‘ladi. Bugun Ukraina Milliy xavfsizlik va mudofaa kengashi hamda Oliy Bosh qo‘mondonlik shtabi o‘zini himoya qilish uchun qarorlar qabul qildi. Ularning barchasi amalga oshiriladi. Biz bitta narsa uchun ishlaymiz – g‘alaba!”,– deydi Volodimir Zelenskiy.

• Rossiya
• Ukraina
• Zelenskiy