Xitoy Markaziy Osiyo davlatlariga mudofaa qobiliyatini mustahkamlashda yordam berishga tayyor. Bu haqda Xitoy yetakchisi Si Szinpin Sian shahrida bo‘lib o‘tayotgan “Xitoy – Markaziy Osiyo” sammitida ma’lum qildi.

“Xitoy Markaziy Osiyo davlatlariga huquq-tartibot va mudofaa salohiyatini mustahkamlashga yordam berishga, shuningdek, mintaqaviy xavfsizlikni saqlash va terrorizmga qarshi kurashish borasidagi sa’y-harakatlarini qo‘llab-quvvatlashga tayyor”, – deydi Si Szinpin.

Shuningdek, u Xitoy Afg‘onistonni tinch yo‘l bilan tiklashga ko‘maklashishda davom etishini ta’kidlab, dunyo barqaror Markaziy Osiyoga muhtojligini aytib o‘tdi.

“Markaziy Osiyoning suvereniteti, xavfsizligi, mustaqilligi va hududiy yaxlitligi saqlanishi, Markaziy Osiyo xalqi tanlagan taraqqiyot yo‘li hurmat qilinishi kerak”, – deya qo‘shimcha qildi u.

Eslatib o‘tish mumkin, 18-may kuni O‘zbekiston Respublikasi Prezidenti Shavkat Mirziyoyevning Xitoyga davlat tashrifi doirasida Xitoy Xalq Respublikasi Raisi Si Szinpin bilan ikki tomonlama muzokaralar natijasida 41 ta hujjat imzolandi. Davlat rahbarlari Qo‘shma bayonotida 2023-2027-yillarga mo‘ljallangan O‘zbekiston bilan Xitoy o‘rtasida yangi davrdagi har tomonlama strategik sheriklikni rivojlantirish dasturi ham qabul qilindi.

• Markaziy_Osiyo
• Xitoy
• sammit