Xitoyda zavoddagi baxtsiz hodisa oqibatida son qismidan to‘liq uzilib ketgan ikkala oyog‘i muvaffaqiyatli qayta ulangan 51 yoshli erkak qariyb 20 oylik davolanishdan so‘ng yana yurishni boshladi. Bu haqda “Chinapress” xabar berdi.

Ma’lum qilinishicha, erkak taxminan 20 oy avval zavodda ishlayotgan vaqtida yuz bergan baxtsiz hodisa oqibatida ikkala oyog‘idan son qismi darajasida to‘liq ayrilgan. Shifokorlar uning oyoqlarini qayta ulash uchun qariyb 8 soat davom etgan murakkab jarrohlik amaliyotini o‘tkazgan.

Suchjou shahridagi Juyxua ortopediya shifoxonasi travmatologiya bo‘limi ma’lumotiga ko‘ra, mazkur amaliyot dunyoda son qismidan to‘liq uzilgan ikkala oyoqni bir vaqtning o‘zida muvaffaqiyatli qayta ulash bo‘yicha ilk holat sifatida qayd etilgan.

Shifokorlarning ta’kidlashicha, bemor hozirda maxsus yurish moslamasi yordamida xona ichida mustaqil harakatlana oladi. U kundalik ehtiyojlarining aksariyatini o‘zi bajarmoqda. Shuningdek, oyoqlardagi sezuvchanlik ham asta-sekin tiklanib, to‘piqdan yuqori qismlarda sezish qobiliyati qayta paydo bo‘lgan.

Tibbiyot xodimlari bemorning ahvoli ijobiy tomonga o‘zgarayotganini qayd etib, u kelgusi bir-ikki yil ichida tayanch vositalarisiz mustaqil yurishi mumkinligini bildirgan.

Avvalroq Rochester universiteti olimlari yalang‘och mol-kalamushning qarishdan himoyalanishiga yordam beruvchi genetik mexanizmlarni boshqa hayvonlarga qisman ko‘chirishga muvaffaq bo‘lgani haqida xabar berilgan edi.