Toshkent xalqaro aeroportida kannabis moyi va psixofaol qo‘ziqorinlar aniqlandi

DXX va Bojxona organlari xodimlari hamkorligida Toshkent xalqaro aeroportida tezkor tadbir o‘tkazildi.

“Bangkok – Toshkent” yo‘nalishida uchib kelgan fuqaroning yuklari belgilangan tartibda rentgen apparati orqali tekshirilganda, shubhali oziq-ovqat mahsulotlari borligi aniqlandi. Yuklar ochib ko‘rilishi natijasida Toshkent viloyatining O‘rtachirchiq tumanida yashovchi, 2002-yilda tug‘ilgan, muqaddam sudlangan shaxs turli oziq-ovqat mahsulotlari niqobi ostida 978 gramm kannabis moyi hamda tarkibida psixofaol modda bo‘lgan, umumiy og‘irligi taxminan 500 grammni tashkil etuvchi qo‘ziqorinlarni olib kelgani ma’lum bo‘ldi.

Aniqlanishicha, mazkur mahsulotlar kelgusida sotish maqsadida olib kelingan.

2. 12 992 dona sibutramin saqlovchi kofe mahsulotlari aniqlandi

Yana bir holatda Toshkent tumani hududida harakatlanayotgan “Damas” rusumli avtomashina to‘xtatilib, xolislar ishtirokida ko‘zdan kechirildi.

Tekshiruv davomida avtomashinada yo‘lovchi sifatida ketayotgan Farg‘ona viloyatining Oltiariq va Uchko‘prik tumanlarida yashovchi, 1987 va 1989-yillarda tug‘ilgan ikki nafar shaxsga tegishli polietilen paketlarda tarkibida “Sibutramin” kuchli ta’sir qiluvchi moddasi bo‘lgan jami 12 992 dona kofe mahsuloti borligi aniqlandi.

Mazkur mahsulotlar belgilangan tartibda rasmiylashtirilib, olib qo‘yildi. Dastlabki ma’lumotlarga ko‘ra, ular qo‘shni davlatdan olib kirilib, Farg‘ona viloyatida sotilishi rejalashtirilgan.

Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilgan bo‘lib, tergov harakatlari olib borilmoqda.