Shveysariya sudi Gulnora Karimova bo‘yicha ishni yakunladi, Lombard Odier banki jarimaga tortildi

Shveysariya sudi Lombard Odierni pul yuvishning oldini olish bo‘yicha zarur choralarni ko‘rmagani uchun 3 million Shveysariya franki (3,68 million dollar) miqdorida jarimaga tortdi. Shu bilan birga, Gulnora Karimovaga nisbatan Shveysariyadagi sud jarayoni to‘xtatildi.

Prokuratura ma’lumotlariga ko‘ra, Karimova 2005–2013-yillar oralig‘ida Shveysariyadagi bank hisob raqamlariga yuzlab million dollar o‘tkazgan va “Office” nomi bilan atalgan jinoiy tuzilmani boshqarganlikda gumon qilingan.

Sud qaroriga binoan, Lombard Odier pul yuvishga qarshi barcha zarur tashkiliy choralarni ko‘rmagani uchun javobgar deb topildi. Shuningdek, 400 million Shveysariya frankidan ortiq aktivlarni musodara qilish haqida qaror chiqarildi.

Bankning sobiq hisob menejeriga esa 24 oylik shartli qamoq jazosi tayinlandi.

Lombard Odier bayonotida ish bankning o‘zi 2012-yilda Shveysariya rasmiylariga shubhali operatsiyalar haqida xabar berganidan keyin boshlanganini bildirib, sud qarori ustidan shikoyat qilishi ma’lum qilindi.

Ma’lumot uchun, O‘zbekistonda Gulnora Karimova turli jinoyatlar, jumladan firibgarlik, pul yuvish, talon-toroj va boshqa ayblovlar bo‘yicha bir necha bor sudlangan. 2020-yilda u 13 yil 4 oy muddatga ozodlikdan mahrum etilgan.