2026-yilning yanvar—iyun oylarida xalqaro pul o‘tkazmalari orqali O‘zbekistonga 9,3 mlrd dollar mablag‘ kelib tushdi. Bu haqda Markaziy bank ma’lum qildi.

Hisobot davrida mamlakatdan xorijga 1,3 mlrd dollar miqdorida mablag‘ yuborilgan. Natijada xalqaro pul o‘tkazmalari bo‘yicha 8 mlrd dollarlik ijobiy saldo shakllangan.

Markaziy bank ma’lumotlariga ko‘ra, 2026-yilning birinchi yarmida O‘zbekiston ichki valuta bozorida xorijiy valutaga bo‘lgan talab qariyb 32 mlrd dollarni tashkil etgan. Bu o‘tgan yilning mos davriga nisbatan 20 foizga ko‘p.

Xorijiy valuta taklifi esa 27,8 mlrd dollarga yetib, bir yil avvalgiga nisbatan 31 foizga oshgan.

Aholi 12,3 mlrd dollarlik valuta sotgan

Yanvar—iyun oylarida O‘zbekiston aholisi tijorat banklariga 12,3 mlrd dollar miqdorida xorijiy valuta sotgan. Bu 2025-yilning birinchi yarmidagi ko‘rsatkichdan qariyb 1,4 baravar ko‘p.

Shu davrda fuqarolar banklardan 6,8 mlrd dollarlik xorijiy valuta sotib olgan. Natijada aholi tomonidan sotilgan valuta hajmi xarid qilinganidan 5,5 mlrd dollarga ko‘p bo‘lgan.

Markaziy bank qayd etishicha, aholining ijobiy valuta saldosi ichki bozorda xorijiy valuta taklifining muhim manbalaridan biri bo‘lib qolmoqda.

Shuningdek, eksport tushumlari hisobidan shakllangan valuta taklifi 10,1 mlrd dollarni tashkil etib, o‘tgan yilning mos davriga nisbatan 30 foizga oshgan.