O‘zbekistonda 2027-yil 1-yanvardan muddatli to‘lov xizmatlarini ko‘rsatuvchi operatorlar faoliyati tartibga solinadi. Bu prezidentning tegishli qarorida belgilangan.

Qarorga ko‘ra, bank va mikromoliya tashkilotlaridan tashqari muddatli to‘lov xizmatlarini ko‘rsatuvchi yuridik shaxslar operator sifatida e’tirof etiladi. Ularning faoliyat yuritish huquqi Markaziy bank tomonidan shakllantiriladigan tegishli reyestrga kiritilgandan so‘ng yuzaga keladi.

Muddatli to‘lov operatorlari faoliyatida quyidagi talablar joriy etiladi:

— mijozlarni raqamli identifikatsiya va verifikatsiyadan o‘tkazish;

— tuzilgan shartnomalar va ularning ijrosi haqidagi ma’lumotlarni kredit byurolari bilan almashish;

— qarz yuki bo‘yicha Markaziy bank tomonidan belgilanadigan talablarni bajarish.

Operatorlarga moliyaviy iste’mol kreditlarini ajratish hamda jismoniy shaxslardan pul mablag‘larini jalb qilish taqiqlanadi.

Shuningdek, muddatli to‘lov shartnomalarida bir qator cheklovlar belgilanadi. Jumladan:

— muddatli to‘lov obyekti qiymati BHMning 250 baravaridan oshmasligi;

— komissiya, ustama va boshqa to‘lovlar shartnomada alohida ko‘rsatilishi;

— asosiy qarzdan tashqari barcha to‘lovlar, jumladan, jarima, penya va vositachilik haqlari yig‘indisi yiliga muddatli to‘lov summasining 50 foizidan oshmasligi;

— iste’molchi qarzni istalgan vaqtda qo‘shimcha jarima, penya va komissiyalarsiz muddatidan oldin to‘lash huquqiga ega bo‘lishi;

— muddatli to‘lov muddati 12 oydan oshmasligi.

Bundan tashqari, ko‘chmas mulk hamda qonunchilikka muvofiq muomalasi cheklangan yoki taqiqlangan boshqa mulk muddatli to‘lov xizmati obyekti bo‘la olmaydi.

2027-yil 1-yanvardan qiymati BHMning 3 baravarigacha bo‘lgan tovar iste’mol kreditlari bo‘yicha ayrim ma’lumotlarni kredit byurolariga taqdim etish talabi ham bekor qilinadi.