Jahon sogʻliqni saqlash tashkilotining navbatdagi hisobotiga koʻra, Yer yuzida mpox (maymun chechagi) epidemiyasi boshlangandan buyon ushbu kasallikni yuqtirganlar soni 85 ming nafardan oshdi. Ulardan 92 nafari xastalik oqibatida hayotdan koʻz yumgan.

Xususan, soʻnggi toʻrt hafta ichida maymun chechagi qayd etilgani yuzasidan 30 ta mamlakat hisobot taqdim etgan.

Keltirilishicha, epidemiya davridagi jami bemorlarning 90 foizi Janubiy va Shimoliy Amerika qitʼalarida yashovchi aholi vakillaridir. Qolgan holatlarning aksariyati Yevropa davlatlarida roʻyxatga olingan.

Dunyodagi epidemiologik vaziyatni hisobga olib, JSST oʻtgan yil 23-iyulda mpox virusini pandemiya deb eʼlon qilgandi. Ammo keyingi paytlarda kasallanish holatlari sezilarli darajada pasaymoqda.

Shu bois tashkilot rahbari Tedros Gebreyesus maymun chechagi pandemiyasini bekor qilish masalasini koʻrib chiqish taklifini oʻrtaga tashlagan.

Qayd etish mumkin, mpox virusi alomatlari asosan isitma, umumiy intoksikasiya va tanada toshmalar bilan namoyon boʻlyapti.

• JSST
• Maymun chechagi