Korrupsiyaga qarshi chiqishlari bilan tanilgan Ekvador prezidentligiga nomzod Fernando Villavicencio kecha, 9-avgust kuni mamlakat poytaxti Kitodagi siyosiy mitingda otib o‘ldirildi.

Ekvadorlik siyosatchi va mamlakat prezidentligiga nomzod 59 yoshli Fernando Villavicencio saylovoldi mitingi chog‘ida otib o‘ldirilgan. Uning xotini va besh nafar farzandi bor edi. Villavicencio mamlakatda korrupsiyani yo‘q qilishga va’da bergan. Bu chiqishlari ortidan esa, unga bir necha bor zo‘ravonlik bilan tahdid qilingan.

Hozirda prezidentlikka nomzod Fernando Villavicencio o‘ldirilishi ortidan Ekvadorda favqulodda holat e’lon qilindi.

Voqea guvohlarining so‘zlari va videotasvirlarga ko‘ra, Villavicencio mashinaga o‘tirganida unga qarata bir necha marta o‘q uzilgan. Gumonlanuvchi qo‘riqchilar bilan otishmada o‘ldirilgan. Otishma oqibatida to‘qqiz kishi jarohatlangan.

Otib o‘ldirilishidan oldin o‘zining so‘nggi nutqida Villavicencio saylovchilarga mamlakatda korrupsiyani yo‘q qilishga va o‘g‘rilarni qamoqqa tashlashga va’da bergan.

Suiqasddan bir necha kun oldin, Villavicencio bir necha marta o‘lim tahdidlarini olganini aytgan, jumladan, tahdidchilar orasida Ekvadorda ochiq faoliyat yuritayotgan ko‘plab xalqaro uyushgan jinoiy guruhlardan biri bo‘lgan qudratli “Meksika Sinaloa” giyohvand moddalarning noqonuniy savdosi bilan shug‘ullanuvchi jinoiy tashkilotining rahbarlari ham borligini ma’lum qilgandi.

Prezident Gilermo Lasso sodir bo‘lgan voqeadan g‘azablanganini va hayratda ekanligini aytdi. U bu jinoyat jazosiz qolmasligiga va’da berdi.

"Sizni ishontirib aytamanki, bu jinoyat jazosiz qolmaydi," - dedi Lasso bayonotida.

Fernando Villavicencioning asl kasbi jurnalist bo‘lib, u o‘z faoliyatini “El Universo” gazetasidan boshlagan. U 2013-yilda siyosatga kirib kelgan. U 2017-yildan qonun chiqaruvchi organ 2023-yil 17-mayda tarqatib yuborilgunga qadar Milliy Assambleya aʼzosi boʻlgan.

Iyul oyida o‘tkazilgan saylovoldi so‘roviga ko‘ra, Fernando Villavicencio 13,2 foiz ovoz to‘plagan. U bu natija bilan “Fuqarolik inqilobi uchun harakat” partiyasi nomzodi, so‘l markazchi siyosatchi Luisa Gonzalez bilan birga 26,6 foiz ovoz to‘plagan holda ikkinchi bosqichga chiqishi mumkin edi. Uchinchi o‘rinda 12,5 foiz ovoz bilan mahalliy xalqlar huquqlari uchun kurashuvchi Yaku Perez joy olgan.

• Ekvador
• Prezident
• Qotillik
• suiqasd