Kuni kecha ijtimoiy tarmoqlarda shu mavzu atrofida turli xil fikrlar yangragani fonida huquqshunos va bloger Xushnud Xudoyberdiyev voqea haqida o‘z sahifasida izoh qoldirdi.

“2025-yil 19-iyuldagi PF-114-sonli Prezident farmoni bilan bir qator hujjatlarga o‘zgarishlar kiritildi va ayrimlari to‘liq o‘z kuchini yo‘qotdi. Masalan, ushbu farmon bilan maktab o‘quvchilarining oxirgi 6 yillik o‘rtacha bahosi test baliga qo‘shilishi bekor bo‘lgani haqida yozgandim.

Ushbu farmonda 2021-yil 19-maydagi PQ-5117-sonli Prezident qarorining 6-bandning to‘rtinchi xatboshisi chiqarib tashlanishi ham belgilangan. Ushbu xatboshida shunday deyilgan edi:

2022/2023 o‘quv yilidan boshlab oliy ta’lim muassasalarining magistratura mutaxassisliklariga hamda oliy ta’limdan keyingi ta’lim ixtisosliklariga tanlovlarda milliy yoki unga mos darajadagi xalqaro sertifikatga ega shaxslar ishtirok etishi tartibi joriy etilsin. Bunda, filologiya yo‘nalishlari bo‘yicha kamida C1 darajadagi milliy yoki unga mos darajadagi xalqaro sertifikat, nofilologik yo‘nalishlari bo‘yicha esa B2 darajadagi milliy yoki unga mos darajadagi xalqaro sertifikat talab etilishi nazarda tutilsin.

Mana shu band chiqarib tashlandi, ya’ni o‘z kuchini yo‘qotdi. Lekin bu sertifikatlar bekor bo‘lganini anglatmaydi. Shunchaki 2021-yildagi mazkur qoidaning o‘zi eskirgan edi. O‘tgan 2024-yilda magistratura va doktoranturaga xorijiy til bilish darajasining yangi qoidasi belgilangan.

2024-yil 24-maydagi PF-81-sonli Prezident farmonida quyidagi yangi talablar belgilangan:

4. Belgilansinki, magistratura mutaxassisliklari va oliy ta’limdan keyingi ta’lim ixtisosliklariga qabul qilishda xorijiy tilni bilish darajasini belgilovchi milliy yoki xalqaro sertifikatlar quyidagi darajalarda talab etiladi:

xorijiy tillar yo‘nalishlari bo‘yicha — kamida C1 darajasida;

gumanitar, biologik va turdosh fanlar, matematika va statistika, biznes va boshqaruv, huquq, xizmat ko‘rsatish, ijtimoiy va xulq-atvorga mansub fanlar, jurnalistika va axborot, axborot-kommunikatsiya texnologiyalari ta’lim sohalari bo‘yicha — kamida B2 darajasida;

boshqa ta’lim sohalari hamda madaniyat va sport mutaxassisliklari (ixtisosliklari) bo‘yicha — kamida B1 darajasida.

Ko‘rib turganingizdek, yangi qoidalarda B1 darajaga ham ruxsat berilgandi.

XULOSA: 2021-yildagi qarordan sertifikatga oid xatboshining chiqarib tashlanganiga asosiy sabab, ushbu qoidalar eskirgani va amalda emasligi edi. Magistratura va doktoranturaga til bilish darajasining yangi qoidalari 2024-yildagi qaror bilan belgilangan va u o‘z kuchida turibdi” – deydi bloger o’z sahifasi orqali.

• Chet tili
• Magistratura
• Oliy ta'lim
• Sertifikat