AQShning Kaliforniya shtati Oklend shahridagi muzeyda o‘g‘rilik yuz berdi, oqibatda mingdan ortiq artefakt yo‘qolgan. Bu haqda “The Oakland Side” xabar berdi.

Qayd etilishicha, hodisa joriy yilning oktyabr oyi o‘rtalarida sodir bo‘lgan. Jinoyatchilar muzeyning asosiy binosidan tashqarida joylashgan saqlash omboriga bostirib kirgan. Ular turli buyumlarni, jumladan, zargarlik buyumlari, mahalliy amerikaliklarga oid savatlar va dagerotiplarni (ilk fotografik suratlar) o‘g‘irlab ketishgan.

“O‘g‘rilik paytida omborda xodimlar bo‘lmagan, biroq bino ichida videokuzatuv kameralari va signalizatsiya tizimi ishlagan”, – deydi muzey ijrochi direktori Lori Fogarti.

Muzey xodimlari o‘g‘irlangan artefaktlarning umumiy qiymatini aniqlash ustida ishlamoqda. Mazkur madaniy muassasaning kolleksiyasi 2 milliondan ortiq artefaktni o‘z ichiga oladi va Oklend shahriga tegishli.

• AQSh
• Kaliforniya
• O'g'irlik
• muzey