Kecha, 7-noyabr kuni ijtimoiy tarmoqlarda Falastin prezidenti Mahmud Abbosga suiqasd uyushtirilgani aks etgan video tarqaldi. Xabar qilinishicha, hujum paytida Abbosning tansoqchilaridan biri otib tashlangan. Biroq Falastinga yaqin manbalar prezidentga suiqasd bo‘lganini inkor etdi. Hozircha suiqasd haqida rasmiy tasdiqlar yo‘q. Yaqin Sharqdagi keskinlik kuchayib borayotgan bir paytda, Falastin prezidenti Mahmud Abbosga suiqasd mintaqani yangi mojaro girdobiga olib keladi.

Falastin prezidentiga qarshi “Abu Jandal o‘g‘illari” nomi ostidagi yangi harakat a’zolari tomonidan ultimatum qo‘yilgani aytilmoqda.
Bu ultimatumni suiqasdga aloqasi bo‘lishi mumkinmi? Falastinda ichki bo‘linish va qo‘zg‘olonlar ko‘tarilish xavfi mavjudmi?

“Abu Jandal o‘g‘illari” kimlar va ular nima istashmoqda?

Ushbu harakat a’zolari o‘zlarining birinchi bayonotlarini 5-noyabr kuni G‘arbiy sohildagi qarorgohida bergan. Berilgan bayonotlarida Isroil hujumlariga qarshi aniq pozitsiyani ishlab chiqish uchun rahbariyatga 24 soat vaqt ajratgan.

Guruh o‘zini “Rahbar Abu Jandal o‘g‘illari”, deb atagan. Ularning tarkibiy qismi Falastin ma’muriyatining bosib olingan G‘arbiy sohildagi turli xavfsizlik bo‘linmalari a’zosi ekanligi aytilmoqda.
Agar Falastin rahbariyati Isroil hujumlariga aniq qarama-qarshi pozitsiya ishlab chiqmasa, qo‘zg‘olon ko‘tarilishini ma’lum qilishgan.

Guruh a’zolari o‘zlarining qisqa bayonotlarida Isroilning hujumlariga jimgina sabr qilishganini, ojizlik ko‘rsatib yordam kutishgani, lekin endi yosh bolalar va ayollarning o‘limiga jim chidab tura olishmasligini bildirgan.
“Biz bugundan boshlab Falastin rahbariyati jinoyatchi (Isroil) ishg‘oliga qarshi to‘liq qarama-qarshilik e’lon qilish uchun tarixiy mas’uliyat oldida turganini e’lon qilamiz”, deb bayonotda aniq kayfiyat ko‘rsatib o‘tishgan.
Shuningdek, ular bombardimonga qarshi barcha vositalarni qo‘llashni, Blinkenning bayonotlarini qoralashni, AQShning hech qanday bo‘linmasi kiritilmasligini talab qilishgan. Guruh o‘zini “Falastin xavfsizlik bo‘linmalarining a’zolari”, deb ta’riflagan.

Abu Jandal kim?

Guruh 2002-yil aprel oyida Jenin qochqinlar lagerini himoya qilish uchun kurash olib borgan zobit Yusuf Ahmad Rayhon sharafiga o‘zini “Abu Jandal o‘g‘illari”, deb ataydi.

Rayhonning nomi Abu Jandal bo‘lib, Jenin jangida Mahmud Tavalbeh bilan birga rahbarlik qilishgan. 2002-yili Ikkinchi Intifada paytida Jenin qochqinlar lageriga Isroil tomonidan bostirib kirishi natijasida yuzlab falastinliklar halok bo‘lgan va yaralangan. Aynan shu zobit sharafiga ular guruhni “Abu Jandal o‘g‘illari” , deb nomlashgan.

• Falastin
• Isroil
• Prezident
• Suitsid