Fransiya deputatlari pensiya yoshini oshirish to‘g‘risidagi qonunni qabul qilish bo‘yicha sessiyada bosh vazir Elizabet Bornning iste’fosini talab qilishdi. Bu haqda “Le Monde” nashri xabar bermoqda.

Qayd etilishicha, sessiya davomida hukumat rahbari Fransiyada pensiya yoshini 62 yoshdan 64 ga oshirish to‘g‘risidagi qonun qabul qilinganini rasman ma’lum qildi.

“Biz parlament qo‘mitalari o‘rtasida erishilgan murosaga tavakkal qila olmaymiz. Pensiya tizimining kelajagiga pul tikib bo‘lmaydi, ushbu sohada islohot zarur”, – dedi u.

Qonun e’lon qilingan paytda zaldagi ko‘plab deputatlar Bornning iste’fosini talab qilib, “Marselyeza” (mamlakat madhiyasi) qo‘shig‘ini kuylashdi. O‘ng qanot “Milliy miting” partiyasi yetakchisi Marin Le Pen bosh vazirning harakatlarini demokratiyaga zarba, deb atadi. U pensiya islohoti majburiy ravishda o‘tkazilganidan so‘ng Bornga ishonchsizlik votumini qo‘llab-quvvatlashini ma’lum qilgan.

15-mart kuni Fransiya bo‘ylab 500 mingga yaqin odam pensiya islohotiga qarshi yanvar oyi oxiridan beri sakkizinchi namoyishga chiqdi. Kasaba uyushmalari faollari pensiya yoshini oshirishga qarshi mitinglarni davom ettirish niyatida ekanligini qayd etgan. Mamlakat bo‘ylab namoyishchilar soni 1,7 milliondan oshib ketdi.

• Bosh vazir
• Fransiya