Turkiya Superligasi 14-turida “Bashakshehir” mehmonda “Qosimposho” ustidan 1:3 hisobidagi g‘alabani qo‘lga kiritdi. Uchrashuv Istanbuldagi “Rejeb Tayyib Erdo‘g‘an” stadionida o‘tkazildi.

Bellashuvdagi hisob 26-daqiqada Abbosbek Fayzullayev tomonidan ochildi. O‘zbekistonlik futbolchi jarima zarbasidan yo‘llagan kuchli va aniq zarbasi bilan jamoasini hisobda oldinga olib chiqdi. Bo‘lim yakunlanayotganda Nuri Shahin jamoasi ustunlikni yanada mustahkamladi. 45+4-daqiqada Amine Harit gol urib, farqni ishonchli ko‘rinishga keltirdi.

Uchrashuvning ikkinchi bo‘limi anchayin keskin kurashlar bilan boshlandi. 79-daqiqaga kelib, mezbonlar hisobdagi farqni qisqartirishga erishishdi. Maydonda 10 kishi bo‘lib qolgan “Bashakshehir”ga o‘yin so‘nggiga qadar oson bo‘lmadi. Ikkinchi bo‘lim yakunida Eldor Shomurodov yana bir gol bilan uchrashuvga mantiqiy yakun yasadi. “Bashakshehir” ushbu o‘yindan so‘ng ochkolari sonini 16 taga yetkazib, turnir jadvalida 9-o‘ringa ko‘tarildi.

• Abbosbek Fayzullayev
• Eldor Shomurodov
• Futbol
• Turkiya