Bugun, 1-mart kuni “Manchester Siti” Angliya Kubogi (FA Cup) nimchorak finalida “Plimut” jamoasiga qarshi bahs olib boradi.

“Shaharliklar” bu bosqichga “Leyton Oriyent” ustida qozonilgan 2:1 hisobidagi irodali g‘alaba bilan yetib keldi. E’tiborlisi, ushbu bahsda jamoaning o‘zbekistonlik legioneri Abduqodir Husanov maydonga tushib, o‘z hisobiga bitta gol ham yozdirib qo‘ygan edi.

Raqib jamoa “Plimut” esa bosqichga kutilmagan natija bilan yetib kelgan. Jamoa ayni dam APL yetakchisi bo‘lib turgan “Liverpul”ni sensatsion tarzda musobaqadan chiqarib yuborgan edi.

Yevropa Chempionlar Ligasida yurishini tugatgan va Angliya Premyer ligasida chempionlik imkoniyatlarini ancha pasaytirib yuborgan Gvardiola jamoasi ushbu musobaqaga jiddiyroq yondashishini inobatga olsak, so‘nggi uchrashuvlarda o‘zini ko‘rsata olgan va asosiy tarkib a’zosiga aylanib borayotgan Husanovning bugungi bahsda asosiy tarkibda maydonga tushishi ehtimoli yuqori.

Bahs Toshkent vaqti bilan 22:45 da “Etihad” stadionida start oladi.

• Abduqodir Husanov
• Angliya
• Gvardiola
• Manchester Siti