Kecha, 25-noyabr kuni Toshkentda Turkiy davlatlar tashkiloti musulmon diniy idoralari rahbarlari kengashining IV yig‘ilishi boshlandi. Bu haqda O‘zbekiston Respublikasi Din ishlari bo‘yicha qo‘mitasining rasmiy telegram kanalida ma’lum qilindi.

Yig‘ilishda Turkiy davlatlar tashkiloti bosh kotibi, Turkiya, Ozarbayjon, O‘zbekiston, Qozog‘iston, Qirg‘iziston muftiylari, ulamolar hamda diniy soha vakillari ishtirok etgan. Anjumanda turkiy dunyoning diniy idoralari o‘rtasidagi aloqalarini mustahkamlash va global muammolarga birgalikda yechim topish mavzularida suhbatlashildi.

Xususan, Turkiya diyonat ishlari boshqarmasi raisi doktor Ali Erbash yig‘ilishda nutq so‘zlab, barcha turkiy xalqlarni din va qadriyatlarni asrashda birdamlikka chaqirgan.

“So‘nggi vaqtlarda musulmonlarga turli tahdidlar kuchaymoqda. Dunyoda terrorizm avj olyapti. Islomofobiyani shakllantirish uchun harakatlar bo‘lyapti. Islomga qarshi fikrlar faol qo‘llab-quvvatlanayotgan bir paytda biz musulmon ahli birlashishimiz, tahdidlarga qarshi birgalikda tura olishimiz kerak. Dinimiz hech qachon terrorizm yoki ekstremizmga asos bo‘lmagan. Biz terrorizimga qarshi ekanimiz juda ko‘p ta’kidlanishi shart bo‘lgan masala.

Islom dini bilan terrorizm o‘rtasida hech qanday bog‘liqlik yo‘q. G‘arb tomonidan islomni terrorizmga bog‘lamoqchi bo‘lmoqdalar. Ular singdirayotgan bu tushunchalar yolg‘on va asossiz. Imperialistik kuchlar islomga qarshi dushmanlarni shakllantirmoqda. Ular o‘zlarining asosiy dushmani sifatida islomni ko‘rishadi. Biz turkiy davlatlar tashkiloti a’zolari dunyoda nimalar bo‘layotganidan xabardormiz. Islom dini terrorizmni manbai yoki ildizi bo‘lmagan. Islom hech qachon terrorizm tomonda bo‘lmagan.

Iyerusalim, Somali, Yaman, G‘azo, Quddus, Falastin, Afg‘oniston kabi joylarda genotsid jinoyatlari yuz berib kelmoqda. Bu insoniy qadriyatlarga zid, juda ham katta jinoyatlardir. Barcha qadriyatlarni buzgan g‘arb endi “bankrot”. Ular o‘z xalqi oldidagi ishonchni ham yo‘qotmoqda. Tavsiya qilardikki, ular qotillik, qirg‘inga qarshi chiqayotgan o‘z aholisini tinglashsin.
Falastinliklarning musulmon bo‘lgani uchun befarq bo‘layotganlar, G‘azo sektoridagi begunoh odamlarni, chaqaloqlarni, ayollarni, qariyalarni o‘ldirayotgan Isroilni qo‘llab-quvvatlaydiganlar vijdonida abadiy sharmandalik bor”, —degan Ali Erbash.

Ekstremizm, aqidaparastlik va mutaassiblik kabi illatlarga qarshi hamkorlikda kurashish, islomofobiyaga murosasiz bo‘lish kabi masalalar muhokama etilgan. Shuningdek, musulmon ummati uchun eng muhim bo‘lgan masalalar hamjihatlikda ko‘rib chiqilib, muammolarni hal etishning yagona yo‘li birdamlikda harakat qilish, o‘zaro aloqalarni mustahkamlash ekani barcha muftiylar tomonidan ta’kidlangan.

• Din ishlari bo‘yicha qo‘mita
• Diniy aqidaparastlik
• Islom
• Terakt
• Turkiya