Irlandiyalik pivo ishlab chiqaruvchi Artur Ginnes 27 yoshida pivo biznesiga qo‘l uradi. U “Ginnes” nomi bilan o‘zining pivo zavodini tashkil qiladi. 1759-yilda Artur Ginnes Dublin shahri (Irlandiya)da pivo zavodini qurgan. 1833-yilga kelib, u Irlandiyadagi eng yirik pivo zavodiga aylanadi.

“Ginnes” pivo zavodining ijrochi direktori Hyu Biver, 1951-yilda ovga chiqadi. Ov paytida oltin tusli rjanka qushini mo‘ljalga ola olmaydi va qolgan ovchilar bilan bu qush Yevropadagi eng tezuchar qushligini aytib bahslashib qoladi.

Oradan 3-yil o‘tgach, Hyu Biver yana shu mavzuda bahslashadi. Bu gal esa u rjanka qushining uchish tezligini Shotlandiya kakligi bilan taqqoslaydi. O‘sha payt Hyu Biverga ajoyib g‘oya keladi. U javobsiz va mavhum ko‘ringan bahslarni hal qilishga yordam beradigan yagona manba yaratilishi kerakligi haqida o‘ylab qoladi.

Hyu Biverning orzusini amalga oshirishga “Ginnes” pivoxonasining yana bir hodimi – yengil atletikachi Kristofer Chatvey yordam beradi. Chatvey universitetidagi do‘stlari Norris va Ross MakUayrterlarga o‘zining fikrini aytadi. Ular hamkorlikda, o‘zlarining kitob yaratish bo‘yicha g‘oyalarini “Ginnes” pivoxonasi rahbariyatiga taqdim etishadi. Rahbariyatga ma’qul keladi va ular bu uchun mablag‘ ajratib berishadi.
Zoolog, fiziolog, meteorolog, botanik va boshqa olimlarga minglab xatlar yuboriladi va ma’lumotlar tizimlashtiriladi. Barcha ma’lumotlar saralab olingach, 1955-yil 27-avgustda Artur Ginnes sharafiga nomlangan 198 betlik kitobning birinchi nusxasi chop etildi. Atigi 3-4 oy ichida bu kitob Buyuk Britaniyada 1-raqamli bestsellerga aylandi.

Hozirgi kunga kelib, “Ginnes rekordlari kitobi” butun dunyoda ingliz tilida chop etiladi. Undan tashqari, yana 37 tilga tarjima qilingan.

• Ginnes
• Lifestyle