Gretsiyada yo‘lovchi va yuk poyezdlarining to‘qnashuvi natijasida 29 kishi halok bo‘ldi, 85 kishi esa jarohatlandi. To‘qnashuv vaqtida yo‘lovchi poyezdining uchta vagoni ag‘darilib, yong‘in chiqqan.

Temir yo‘l halokati Larisa shahri yaqinidagi Tempi aholi punkti yaqinida, Yevangelismos stansiyasida (Afinadan 200 km shimoli-g‘arbda) sodir bo‘lgan. Yo‘lovchi poyezdi Afina – Saloniki yo‘nalishi bo‘ylab harakatlangan, “Hellenis Train” kompaniyasi ma’lumotlariga ko‘ra, unda 350 kishi bo‘lgan.

To‘qnashuv vaqtida ag‘darilgan 3 vagonning ikkitasi butunlay vayron bo‘lgan, biri yonib ketgan. Tesaliya prefekti so‘zlariga ko‘ra, qutqaruvchilar tomonidan barcha jabrlanganlar evakuatsiya qilingan va endilikda faqat halok bo‘lganlar qidirilmoqda.

Qayd etilishicha, hodisa joyida ikki yuzga yaqin o‘t o‘chiruvchi, qutqaruvchi va harbiylar ishlamoqda.

• Avtohalokat
• Gretsiya
• Halokat
• Poyezd