Sog'liqni saqlash vazirligi Zangiota 1-son yuqumli kasalliklar shifoxonasidagi bugungi holat haqida ma'lumot berdi.

Vazirlik xabariga ko'ra, shifoxona 2000 o‘ringa mo‘ljallangan bo‘lib, ayni paytda u yerda koronavirusga gumon qilingan, PZR test tasdiqlangan va pnevmoniyaga chalingan 737 nafar bemor davolanmoqda.
Shuningdek, ushbu shifoxona direktori Anvar Husanovning so'zlariga ko'ra, so‘nggi 10 kun ichida muassasaga o‘rta hisobda har kuni 85 nafar bemor qabul qilinib, kuniga  ularning o‘rtacha 63 nafari sog‘aymoqda.
Ta’kidlanishicha, ayni paytda shifoxonaga murojaat qilayotganlarni turli yosh toifasidagi insonlar tashkil etmoqda. Qolaversa, muassasaning jonlantirish bo‘limida muolaja olayotgan og‘ir va o‘ta og‘ir ahvoldagi bemorlar orasida bolalar, yoshlar va katta yoshdagi insonlar ham bor. Ularning ko‘pchiligi koronavirusga qarshi emlanmagan.
"Poytaxtimizning Mirzo Ulug‘bek tumanida yashovchi 68 yoshli B.N. ana shunday bemorlardan. O‘z vaqtida vaksina olmagani sababli joriy yil 24-noyabrda koronavirus kasalligining og‘ir kechishi bilan ushbu shifoxonaga olib kelingan. Yondosh xastaliklari bo‘lgani bois keyinchalik reanimatsiya bo‘limiga o‘tkazilgan.
Shu kungacha kasalxonamizda davolangan bemorlar orasida vaksina olgan 531 nafar bemorning 509 nafarida (96 foiz) kasallik yengil va o‘rta og‘ir darajada kechgan. Qolgan 22 nafarida kasallik nisbatan og‘ir o‘tgan. Bunga esa ularning aksariyati katta yoshli ekani, shu bilan birga, yurak yetishmovchiligi, gipertoniya, qandli diabet kabi yondosh kasalliklari borligi sababdir”, - deydi Zangiota 1-son yuqumli kasalliklar shifoxonasi direktori o‘rinbosari Hilola Alimova.

• COVID-19
• Tibbiyot
• koronavirus