Xitoyning “Huawei” kompaniyasi 2022-yilning birinchi yarmidagi sof foydasi 52 foizga kamayganini ma’lum qildi. Ushbu ko‘rsatkichlarga murakkab iqtisodiy vaziyat ta’sir ko‘rsatdi, bu esa ishlab chiqaruvchining tovarlariga bo‘lgan talabning qisqarishiga olib keldi. Natijada AQSH sanksiyalari ostida qolgan “Huawei” kompaniyasining ahvoli yanada og‘irlashdi.

Kompaniyaning yillik daromadi 5,9 foizga kamayib, 44,73 milliard dollarni tashkil etdi. Eng keskin pasayish yanvar-mart oylarida sodir bo‘lgan.

“Qurilmalar biznesdagi katta yo‘qotishlarga qaramay, AKT infratuzilmasi biznesi barqaror o‘sishda davom etmoqda”, – dedi kompaniya rahbari Ken Xu.

Kompaniyaning foyda marjasi 5 foizga qisqargan va sof foyda 2,24 milliard dollarni tashkil etgan. 2021 yilning birinchi yarmida u 4,46 dollarga yetdi.

“Huawei” kompaniyasining ta’kidlashicha, iqtisodiy qiyinchiliklar, COVID-19 cheklovlari va ta’minot zanjiri muammolari kompaniya smartfonlari hamda noutbuklari savdosiga putur yetkazgan. Ushbu segmentdan tushgan daromad chorakdan ko‘proqqa qisqarib, 15,02 milliard dollarni tashkil etgan.

Daromadga “Huawei” kompaniyasining yangi texnologiyalar va biznesga kiritgan sarmoyasi ham ta’sir ko‘rsatdi.

2019-yilda Qo‘shma Shtatlar Xitoy kompaniyasini qora ro‘yxatga kiritdi, bu esa “Huawei”ning bir qator Amerika texnologiyalariga kirishini chekladi. Bu ishlab chiqaruvchining chiplar va boshqa komponentlarni ishlab chiqish qobiliyatiga putur yetkazdi. AQSHning taqiqi smartfon kompaniyasi biznesiga salbiy ta’sir ko‘rsatdi.

Qayd etilishicha, “Huawei” yangi biznes yo‘nalishlarini yaratishga majbur. Shuningdek, kompaniyaning 300 millionga yaqin qurilmalari uchun foydalaniladigan o‘zining “Harmony” operasion tizimini chiqardi. O‘tgan oy oxirida ishlab chiqaruvchi OTning yangi versiyasi – “HarmonyOS 3.0”ni taqdim etdi. Tizim avvalgi iterasiyalardan yuqori unumdorlik, maxfiylik va xavfsizlik bilan farq qiladi. Uning chiqarilishi sentyabr oyida bo‘lib o‘tadi.

Iyul oyi boshida FQB “Huawei” uskunalari AQSHning maxfiy harbiy ma’lumotlarini, jumladan, mamlakat yadroviy arsenaliga oid informasiyalarni tutib olish va Xitoyga uzatishga qodirligi haqida xabar bergan edi. Bu xabar Xitoy kompaniyasining AQSH rasmiylari bilan munosabatlari yomonlashishiga olib kelishi mumkin.

• AQSh
• Huawei
• Xitoy
• texnologiya