Tadqiqot shuni ko‘rsatdiki, ijtimoiy tarmoqlarda tanaffus qilish ayollarning o‘zini o‘zi qadrlashi va jismoniy holatiga ijobiy ta’sir qiladi. Birinchi o‘zgarishlar yuz berishi uchun hatto bir hafta ham yetarli ekan.

Kanadadagi York universiteti jamoat salomatligi fakulteti olimlari universitetning 66 nafar birinchi kurs talaba qizlari ishtirokida tadqiqot o‘tkazdilar. Ularning yarmi odatdagidek ijtimoiy tarmoqlardan foydalangan, qolgan yarmi esa yetti kun davomida turli blog platformalaridagi yangiliklarni tekshirishdan o‘zini tiygan.

Barcha ishtirokchilar eksperimentdan oldin va keyin so‘rovnomalarni to‘ldirishdi. Ularning tahlillari shuni ko‘rsatdiki, ijtimoiy tarmoqlarda tanaffus qilgan qizlar o‘zlarining tashqi ko‘rinishi va o‘zlarini boshqalar nazarida idrok etishlarini yaxshiroq baholay boshlaganlar.

Ijobiy ta’sir, ayniqsa, noziklikni ideallashtiradigan va uni go‘zallik standarti deb hisoblaydigan talaba qizlar orasida qayd etilgan.

Tadqiqot tashabbuskorlaridan biri, psixologiya professori Jennifer Millsning ta’kidlashicha, ayollar moda va go‘zallik nashrlariga bir necha daqiqadan bir necha soatgacha vaqt sarflashgan. U yerda har doim yangi narsa paydo bo‘ladi, bu esa miyaning mukofot tizimini ishga tushiradi va ko‘proq tomosha qilish zaruratini keltirib chiqaradi, deb yozadi “Medical Xpress”.

• Ayollar
• Ijtimoiy tarmoq